சிவனின் ஏழுமலை…பிரம்மிக்க வைக்கும் வெள்ளியங்கிரி மலை ரகசியம்

பல அதிசயங்கள், ஆச்சரியங்கள் நிறைந்த வெள்ளியங்கிரி மலையில் பல அற்புத மூலிகைகள் உள்ளதாக சொல்லப்படுகிறது. இங்குள்ள ஏழு மலைகளும் ஒவ்வொரு வகையான தனித்துவமும், சிறப்புகளும் கொண்டதாகும். இங்கு ஏராளமான சுனைகளும் சிறிய கோவில்களும் உள்ளன. ஏழுமலைகளை கடந்து மலை உச்சியில் இருக்கும் வெள்ளியங்கிரி ஆண்டவரை தரிசித்தால் கைலாயத்திற்கு சென்று சிவனை தரிசித்த பயன் கிடைக்கும் என சொல்லப்படுகிறது.

​சிவனின் ஏழுமலை :

திருப்பதி பெருமாளை தான் ஏழுமலையான் என நாம் அழைப்பதுண்டு. ஆனால் இந்த பெயர் சிவனுக்கும் பொருந்தக் கூடியது தான். பெருமாள் மட்டுமல்ல சிவனும் ஏழுமலையை கடந்து கோவில் கொண்டுள்ளார் என்றால் உங்களால் நம்ப முடிகிறதா? அப்படி ஒரு அற்புதமா, அதிசய கோவில் கொங்கு மண்டலத்தில் அமைந்துள்ளது. கோவையில் இருந்து 30 கி.மீ., தூரத்தில் அமைந்துள்ள வெள்ளியங்கிரி மலை தான் சைவர்களின் ஏழுமலையாக திகழ்கிறது. ஆன்மிக தலமாகவும், சுற்றுலாத் தலமாகவும் விளங்கும் வெள்ளியங்கிரி மலைக்கு ஏராளமான பக்தர்கள் வந்து செல்வதுண்டு. மேற்குத் தொடர்ச்சி மலையில் அமைந்துள்ள இக்கோவில் தமிழகத்தில் உள்ள மிக முக்கியமான புனித தலமாக கருதப்படுகிறது.

வெள்ளியங்கிரி மலை சிறப்புகள் :

மேகங்கள் சூழ்ந்து, வெள்ளியை உருக்கி ஊற்றியது போல் காணப்படுவதால் இதற்கு வெள்ளியங்கிரி என்ற பெயர் ஏற்பட்டது. இங்குள்ள சிவன் கோவில் மிகவும் பிரபலமானதாகும். இந்த மலையில் சிவன் வீற்றிருப்பதாக ஐதீகம் உள்ளதால் இதை தென் கைலாயம் என்றும் பக்தர்கள் அழைக்கிறார்கள். ரத்தினகிரி, தக்ஷின கைலாசம், பூலோக கயிலாயம் என்றெல்லாம் இக்கோவில் அழைக்கப்படுகிறது. சிவன் பஞ்சபூதங்களின் வடிவில் காட்சி தரும் கோவில்களை பஞ்சபூத தலங்கள் என தனித்தனியாக சென்று வழிபடுகிறோம். ஆனால் வெள்ளியங்கிரியில் பஞ்சபூதங்களும் ஒன்றிணைந்த வடிவமாக சிவன் காட்சி தருகிறார். பிரபஞ்சத்திலேயே மிகவும் சக்தி வாய்ந்த இடமாக இம்மலை கருதப்படுகிறது.

வெள்ளியங்கிரி மலை :

வெள்ளியங்கிரி மலையின் அடிவாரத்திற்கு பூண்டி என்று பெயர். இங்கு வெள்ளியங்கிரி ஆண்டவர் கோவில் உள்ளது. தாயார் மனோன்மணி அம்மன் என்ற திருநாமத்துடன் காட்சி தருகிறார். இங்கு தியான லிங்கமும் உள்ளது. மலையேறி செல்ல முடியாதவர்கள் இங்கு வந்து வெள்ளியங்கிரி ஆண்டவரை வழிபட்டு செல்கின்றனர். அதோடு ஐந்து விநாயகர்கள் காட்சி தரும் பஞ்ச விநாயகர் மண்டபம், பக்தர்கள் தங்கி ஓய்வெடுப்பதற்கான மண்டபம் உள்ளிட்டவைகளும் அமைந்துள்ளன. வெள்ளியங்கிரி மலை ஏறும் பக்தர்கள் முதலில் இங்கு வந்து வழிபட்ட பிறகே மலையேறி செல்கின்றனர். இதற்கு மேல் 3500 அடி உயரம் கொண்ட ஏழு மலைகள் காணப்படுகின்றன. இதன் ஏழாவது மலையின் உச்சியில் உள்ள குகையில் சுயம்பு லிங்கம் ஒன்று உள்ளது. இந்த ஏழுமலை ஏறிச் செல்வது அவ்வளவு எளிதான காரியம் கிடையாது. இந்த மலையில் வெள்ளை விநாயகர் கோவில், பாம்பாட்டி சுனை, கைதட்டி சுனை, சீதைவனம், அர்ச்சுனன் வில், பீமன் களி உருண்டை, ஆண்டி சுனை ஆகிய இடங்கள் அவசியம் தரிசிக்க வேண்டிய இடங்களாகும்.

வெள்ளியங்கிரி மலை வரலாறு :

​சிவ பெருமான் மீது தீவிரமான பக்தி கொண்ட பெண் ஒருத்தி, சிவனையே திருமணம் செய்து கொள்ள வேண்டும் என உறுதியாக இருக்கிறாள். அது மட்டுமல்ல குறிப்பிட்ட காலத்திற்குள் சிவனை திருமணம் செய்து கொள்ள முடியாமல் போனால் தன்னுடைய மாய்த்துக் கொள்ளவும் முடிவு செய்கிறாள். சிவனை மணம் முடிக்க நின்ற கோலத்தில் தவம் செய்கிறாள். அவளது பக்தியால் மனம் மகிழ்ந்த சிவனும் அவளுக்கு அருள் செய்ய வருகிறார். ஆனால் அதற்கு பலவிதமான இடையூறுகள் ஏற்படுகிறது. இதனால் அந்த பெண் குறிப்பிட்ட காலத்திற்குள் சிவனால் வர முடியாமல் போய்கிறது. இதன் காரணமாக அந்த பெண்ணும் நின்ற கோலத்தில் உயிரை விடுகிறாள். அவளே தமிழகத்தின் தென்கோடியில் கன்னியாகுமரியாக கோவில் கொண்டுள்ளார். தனது பக்தையை உரிய நேரத்தில் வந்து காப்பாற்ற முடியாமல் போனதால் மனம் வருந்திய சிவன், மன அமைதிக்காக ஒரு இடத்தை தேடுகிறார். அப்படி அவர் தேடி சென்று, மலையேறி அமர்ந்த தலம் தான் வெள்ளியங்கிரி மலை என தல புராணம் சொல்கிறது.

வெள்ளியங்கிரி மலை அதிசயம் :

வெள்ளியங்கிரியின் ஏழாவது மலையில் அமைந்துள்ள சிவலிங்கம், சுயம்புவாக தோன்றியதாகும். இங்கு பல சித்தர்கள் ஸ்தூல வடிவிலும், சூட்சும வடிவிலும் இன்னும் வசித்து வருகிறார்கள். இந்த மலையில் பயணம் செய்வது ஈசனை படிப்படியாக நெருங்கிச் செல்வதற்கு சமமானதாகும். இந்த ஏழு மலைகளும், மனித உடலில் உள்ள ஏழு சக்கரங்களை குறிப்பதாகும். இங்குள்ள ஆண்டி சுனையில் நீராடி விட்டு, சிவனை சென்று வழிபட்டால் உடலில் உள்ள நோய்கள் பலவும் நீங்குவதாக சொல்லப்படுகிறது. சில முக்கிய நாட்களில் இங்கு திடீரென சிவ பூஜைக்கான பிரணவ மந்திரமும் ஓலிக்கும் சத்தம், சிவனுக்குரிய பஞ்ச வாத்தியங்கள் முழங்கும் சத்தமும் கேட்பதாக பக்தர்கள் பலர் கூறுகின்றனர். இந்த சத்தங்கள் பூமிக்கு அடியில் வாசிப்படுவதாகவும், அந்த சத்தம் ஏழாவது மலை வரை கேட்பதாகவும் சொல்லப்படுகிறது. இது தவிர சங்கின் ஒலி, வேத மந்திரங்கள் ஒலிக்கும் சத்தமும் அவ்வப்போது கேட்பதாகவும் பக்தர்கள் கூறுவதுண்டு.

வெள்ளியங்கிரி மலை தரிசன நேரம் :

வெள்ளியங்கிரி மலை கோவில் அமைந்துள்ள இடம் அடர்ந்த வனப்பகுதி என்பதால் வன விலங்குகளின் நடமாட்டம் அதிகம் உள்ளதால் மாலை 6 மணிக்கு நடை அடைக்கப்பட்டு விடும். அதே சமயம் மலை மீது இருக்கும் கோவில் 24 மணி நேரமும் திறந்திருக்கும். மலை ஏறி செல்பவர்கள் மாலை நேரத்தில் மலையேற துவங்கி, காலையில் வெயில் அதிகமாவதற்குள் அடிவாரத்தை அடைந்து விட வேண்டும் என கேட்டுக் கொள்ளப்படுகிறது. பிப்ரவரி முதல் ஜூன் வரையிலான மாதங்களே வெள்ளியங்கிரி மலை செல்ல சரியான காலமாக சொல்லப்படுகிறது. மற்ற மாதங்களில் மழை, பனி காரணமாக பக்தர்கள் மலையேறிச் செல்ல வனத்துறை அனுமதிப்பது கிடையாது. மகா சிவராத்திரி, சித்ரா பெளர்ணமி ஆகிய காலங்களில் அதிகமான பக்தர்கள் வெள்ளியங்கிரி ஆண்டவரை தரிசிக்க வருகிறார்கள். சமீப காலமாக பிரதோஷ நாட்களிலும் சிலர் வெள்ளியங்கிரி மலை செல்வதை வழக்கமாகக் கொண்டுள்ளனர்.

வெள்ளியங்கிரி மலை ஏறுவதற்கான நிபந்தனைகள் :

10 வயதிற்கு மேலும், 40 வயதிற்கு கீழும் உள்ள பெண்கள் மலை ஏறக் கூடாது. மலையில் ஏற ஏற ஆக்சிஜனின் அளவு குறைவாக இருக்கும் என்பதால் இரத்த அழுத்தம், சர்க்கரை நோய், இதயம் பலவீனமானவர்கள், 40 வயதிற்கு மேற்பட்டவர்கள் மலையேறி செல்வதை தவிர்க்க வேண்டும் என சொல்லப்படுகிறது. மலைேறும் போது பனிப்புயல், மழை ஏற்பட்டால் உடனடியாக மலை ஏறாமல் திரும்பி வந்து விட வேண்டும் என கேட்டுக் கொள்ளப்படுகிறார்கள். ஏழுமலை ஏறுவதை விட இறங்குவது மிகவும் சிரமமாக இருக்கும் என்பதால் பக்தர்கள் தங்களின் வழித்துணையாக கையில் மூங்கில் தடி ஒன்றை வைத்துக் கொண்டே ஏறுகிறார்கள்.