Rice Crackers: ஈவினிங் டீக்கு மொறு மொறு ஸ்நாக் – இவ்வளவு ஈசியா செய்யலாமா

பொதுவாகவே நம்மில் பலர் மாலை நேரத்தில் தேநீருடன் வேறு ஏதாவது சாப்பிட ஆசைப்படுவார்கள்.

அதுவும் மொறுமொறுப்பான மற்றும் சுவையான உணவுகளை தான் அதிகமாக விரும்புவார்கள். அந்தவகையில் அனைவரும் அதிகமாக விரும்பி சாப்பிடும் அரிசி தட்டை எப்படி ஈசியா செய்யலாம் என இந்த பதிவில் தெரிந்துக்கொள்வோம்.

தேவையான பொருட்கள்
அரிசி மாவு – 2 கப்
கடலை பருப்பு – 1/4 கப்
கறிவேப்பிலை
இஞ்சி – 1 துண்டு
பச்சை மிளகாய் – 3
உப்பு – 1 தேக்கரண்டி
மஞ்சள் தூள் – 1/2 தேக்கரண்டி
காஷ்மீரி மிளகாய் தூள் – 2 தேக்கரண்டி
சீரகம் – 1 தேக்கரண்டி
எள் – 2 தேக்கரண்டி
பெருங்காய தூள் – 1/4 தேக்கரண்டி
வெண்ணெய் – 2 தேக்கரண்டி
வெந்நீர்
எண்ணெய் – பொரிப்பதற்கு

செய்முறை
1. மசாலா அரைக்க கறிவேப்பிலை, பச்சை மிளகாய் மற்றும் இஞ்சியை ஒன்றாக சேர்த்து மிக்ஸி ஜாரில் அரைத்து தனியாக வைக்கவும்.

2. இப்போது ஒரு பெரிய பாத்திரத்தில் அரிசி மாவை எடுத்துக் கொள்ளவும்.

3. 1 மணி நேரம் தண்ணீரில் ஊறவைத்த கடலை பருப்பு சேர்க்கவும். அத்துடன் அரைத்த மசாலா விழுதையும் சேர்க்கவும்.

4. அடுத்து உப்பு, மஞ்சள் தூள், காஷ்மீரி சிவப்பு மிளகாய் தூள், சீரகம், எள், பெருங்காய தூள் மற்றும் உப்பில்லாத வெண்ணெய் சேர்க்கவும்.

5. இவை அனைத்தையும் நன்கு கலக்கவும்.

6. அடுத்து சூடான கொதிக்கும் நீரை படிப்படியாக ஊற்றி மாவை தயார் செய்யவும். சுமார் 10 நிமிடங்கள் மூடி வைக்கவும்.

7. அகன்ற கடாயில் எண்ணெயை சூடாக்கவும்.

8. ஒரு வாழை இலையில் சிறிது எண்ணெய் தடவி, மாவை சிறிய உருண்டையாக உருட்டி வைக்கவும். தண்ணீரில் கையை ஈரப்படுத்தி மெதுவாக அதை சமமாக அழுத்தவும்.

9. சூடான எண்ணெயில் சேர்த்து எல்லா பக்கங்களிலும் பொன்னிறமாகும் வரை வறுக்கவும்.

10. கடாயில் இருந்து எடுத்து ஆறவைக்கவும்.

11. அவை அனைத்தும் முழுவதுமாக குளிர்ந்தவுடன், காற்று புகாத டப்பாவில் 4-5 நாட்களுக்கு வைத்து பரிமாறவும்.