கோடைகாலத்தில் உதவும் சூப்பர் சிஸ்டம்… உங்கள் காரில் உள்ள அதிகம் பயன்படுத்தப்படாத அமைப்பை தெரிஞ்சிக்கோங்க….

கோடை காலம் நெருங்கி வரும் நிலையில், காருக்குள் இருக்கும் அதிகம் அறியப்படாத அமைப்பு குறித்து இந்த பதிவில் பார்க்கலாம். இது உங்கள் காரின் வெப்பநிலையை சமநிலையில் வைக்க உதவும்.

இந்தியாவில் குளிர்காலம் இறுதிக் கட்டத்தை எட்டியுள்ளன. விரைவில் கொளுத்தும் கோடை நாட்கள் வரப்போகிறது. கோடையில், குறிப்பாக நண்பகல் நேரத்தில், வெப்பநிலை அதிகமாக இருக்கும். அந்த நேரத்தில் காரை வெளியில் சிறிது நேரம் நிறுத்தினாலும், கார் சூடாகத் தொடங்குகிறது. இருக்கை முதல் ஸ்டீயரிங் வரை அனைத்தும் வெப்பத்தால் கொதித்து விடும்.

அத்தகைய சூழ்நிலையில், ஏசியை ஆன் செய்த பிறகும், கார் குளிர்விக்க சிறிது நேரம் எடுக்கும். இந்த நேரத்தில், காரில் காணப்படும் ஒரு சிறப்பு பட்டன் உங்களுக்கு பயனுள்ளதாக இருக்கும். ஏசியுடன் சேர்த்து அதை இயக்கினால் கார் வேகமாக குளிர்ச்சியடைய உதவுகிறது. காரில் காணப்படும் காற்று மறுசுழற்சி பட்டன் தான் அது.

காரில் உள்ள காற்று மறுசுழற்சி பட்டன் வெளிப்புறக் காற்றை இழுப்பதற்குப் பதிலாக கேபினுக்குள் இருக்கும் காற்றை மறுசுழற்சி செய்யும் வகையில் வடிவமைக்கப்பட்டுள்ளது. இது காற்றை நேரடியாக குளிர்விக்க முடியாவிட்டாலும், சில காரணங்களால் கோடை காலத்தில் காரை வேகமாக குளிர்விக்க இது உதவும்.

கோடை நாட்களில் வெளிப்புறக் காற்றை விட கேபின் காற்று பொதுவாக குளிர்ச்சியாக இருக்கும். காருக்குள் உள்ள காற்றை மறுசுழற்சி செய்வதன் மூலம், சிஸ்டம் அதிக வெப்பமான காற்றை குளிர்விக்க வேண்டியதில்லை, இது ஏர் கண்டிஷனிங் சிஸ்டத்தில் உள்ள சுமையை குறைத்து, ஏசி மிகவும் திறமையாக வேலை செய்ய உதவுகிறது.

சில சூழ்நிலைகளில், குறிப்பாக அதிக ட்ராஃபிக்கில் அல்லது காரை நிறுத்தும்போது, ​​மறுசுழற்சி செய்யப்பட்ட காற்றைப் (Air ReCirculation) பயன்படுத்துவது காருக்குள் மிகவும் வசதியான வெப்பநிலையை பராமரிக்க உதவும்.

மறுசுழற்சி பயன்முறையானது காரை விரைவாக குளிர்விக்க உதவும் என்றாலும், அது நீண்ட கால பயன்பாட்டிற்கு ஏற்றதாக இருக்காது என்பதை கவனத்தில் கொள்ள வேண்டும். ஏனெனில், புதிய வெளிக்காற்று இல்லாமல் நீண்ட நேரம் மறுசுழற்சி பயன்முறையைப் பயன்படுத்துவதால், அறைக்குள் இருக்கும் காற்றின் தரம் குறைந்து விடும். ஏனெனில் ஈரப்பதம் மற்றும் மாசுபாடுகள் அதில் குவிந்துவிடும். எனவே, சிறந்த காற்றோட்டத்திற்காக அவ்வப்போது ஏர் ரீ சர்குலேஷன் அல்லாமல், வெளிப்புற புதிய காற்று முறைக்கு மாறுவது நல்லது.