கனடாவில் இந்தியரை சுட்டுக்கொன்ற மற்றொரு இந்திய வம்சாவளி இளைஞர் கைது

கனடாவின் Ontario மாகாணத்தில் இந்திய இளைஞர் ஒருவர் சுட்டுக்கொல்லப்பட்டது தொடர்பில், மற்றொரு இந்திய வம்சாவளி இளைஞர் கைது செய்யப்பட்டுள்ளார்.

இந்திய வம்சாவளி இளைஞர்
கடந்த ஆண்டு டிசம்பர் மாதம் 19ஆம் திகதி, பிராம்ப்டன் நகரைச் சேர்ந்த நிஷான் திந்த் (18) எனும் இந்திய வம்சாவளி இளைஞர் துப்பாக்கிச்சூட்டிற்கு ஆளானார்.

இதனையடுத்து அவர் உள்ளூர் மருத்துவமனையில் அனுமதிக்கப்பட்டார். ஆனால், அவர் சிகிச்சை பலனின்றி உயிரிழந்ததைத் தொடர்ந்து, பொலிஸார் வழக்குப்பதிவு செய்து விசாரணை நடத்தினர்.

அப்போது இளைஞர் ஒருவர் துப்பாக்கியால் சுட்டது தெரிய வந்தது. மேலும் அவரும் இந்திய வம்சாவளியைச் சேர்ந்தவர் என்றும் தெரிய வந்தது.

கைது செய்த பொலிஸார்
இந்த நிலையில் பிரீத்பால் சிங் (18) எனும் நபரை பொலிஸார் கைது செய்துள்ளனர். அவரும் பிராம்ப்டன் நகரைச் சேர்ந்த இந்திய வம்சாவளி என தெரிவிக்கப்பட்டுள்ளது.

அத்துடன் பொலிஸார் காவலில் இருந்த அவர் Ontario நீதிமன்றத்தில் ஆஜர்படுத்தப்பட்டார். அவர் குறித்து பொலிஸார் விசாரணை வலுக்கும் வகையில் தகவல்களை சேகரித்து வருவதாக கூறப்படுகிறது.