அருண் விஜய் நடித்த மிஷன் சாப்டர் 1 ஓடிடி ரிலீஸ் தேதி அறிவிப்பு…

பொங்கலையொட்டி வெளியாகி சூப்பர் ஹிட்டான மிஷன் சாப்டர் 1 படத்தின் ஓடிடி ரிலீஸ் தேதி அறிவிக்கப்பட்டுள்ளது. சிவகார்த்திகேயன் நடித்த அயலான், தனுஷின் கேப்டன் மில்லர் போன்ற அதிகம் எதிர்பார்க்கப்பட்ட படங்களுடன் போட்டியிட்டு, அருண் விஜய்யின் மிஷன் சாப்டர் 1 திரைப்படம் பொங்கலையொட்டி வெளிவந்தது.

தொடக்கத்தில் அயலான், கேப்டன் மில்லர் படங்கள் நல்ல வரவேற்பை பெற்றது. சில நாட்களுக்கு பின்னர், மிஷன் சாப்டர் 1 படம் ரசிகர்களுக்கு பிடித்துப் போகவே, அந்த படத்தை வெளியிட்ட திரையரங்குகளின் எண்ணிக்கை அதிகரித்தன.

ஆக்சன் + எமோஷனல் ஜேனரில் வெளிவந்த இந்த படத்தை ஏ.எல். விஜய் இயக்கியிருந்தார். இந்த படத்தில் அருண் விஜய்யுடன் எமி ஜாக்சன், நிமிஷா சஜயன் உள்ளிட்டோர் நடித்திருந்தனர். இந்தியா மீதான தீவிரவாத தாக்குதல் மற்றும் அப்பா மகள் சென்டிமென்டை மையமாக வைத்து இந்த படம் உருவாக்கப்பட்டிருந்தது.

திரையரங்குகளில் 25 நாட்களை நிறைவு செய்த இந்த படம் வெற்றி பெற்றுள்ளதாக தயாரிப்பாளர்கள் தரப்பில் தெரிவிக்கப்பட்டுள்ளது. இந்நிலையில் மிஷன் சாப்டர் 1 வரும் 16 ஆம் தேதியன்று நெட்ஃப்ளிக்ஸ் ஓடிடி தளத்தில் வெளியாகும் என்று அறிவிக்கப்பட்டுள்ளது.

பொங்கலையாட்டி வெளிவந்த அயலான் மற்றும் கேப்டன் மில்லர் படங்கள் நாளை முதல் ஓடிடி தளங்களில் வெளியாகிறது. அயலான் சன் நெக்ஸ்ட்டிலும், கேப்டன் மில்லர் அமேசான் ப்ரைமிலும் ஸ்ட்ரீமிங் ஆகவுள்ளது. இதேபோன்று தெலுங்கில் மகேஷ் பாபு நடித்த குண்டூர் காரம் திரைப்படம் நெட்ஃப்ளிக்ஸ் தளத்தில் நாளை வெளியாகவுள்ளது.