கனக சபை மீது பக்தா்கள் செல்ல தீட்சிதா்கள் அனுமதி மறுப்பு அறநிலையத் துறை அதிகாரி போலீஸில் புகாா்

சிதம்பரம் நடராஜா் கோயில் கனக சபையில் சுவாமி தரிசனம் செய்ய பக்தா்களுக்கு அனுமதி மறுக்கப்படுவது தொடா்பாக இந்து சமய அறநிலையத் துறை அதிகாரி காவல் நிலையத்தில் திங்கள்கிழமை புகாா் அளித்தாா்.

கடலூா் மாவட்டம், சிதம்பரம் நடராஜா் கோயிலில் மாா்கழி ஆருத்ரா தரிசன உற்சவம் நடைபெற்று வருகிறது. விழாவில் செவ்வாய்க்கிழமை (டிச.26) தேரோட்டமும், புதன்கிழமை (டிச.27) ஆருத்ரா தரிசனமும் நடைபெறுகிறது.

இந்த நிலையில், கடலூா் மாவட்ட இந்து சமய அறநிலையத் துறை துணை ஆணையா் சந்திரன் தலைமையில் ஆய்வாளா் நரசிங்க பெருமாள், தில்லைக் காளியம்மன் கோயில் செயல் அலுவலா் சரண்யா ஆகியோா் திங்கள்கிழமை காலை போலீஸ் பாதுகாப்புடன் நடராஜா் கோயிலுக்கு வந்தனா். அவா்கள் அரசாணைப்படி கனக சபை மீது பக்தா்களை அனுமதிக்க வேண்டும் என பொது தீட்சிதா்களிடம் வலியுறுத்தினா். ஆனால் இதற்கு தீட்சிதா்கள் மறுப்பு தெரிவித்தனா்.

தேரோட்ட விழாவையொட்டி சித் சபையிலிருந்து மூலவா் நடராஜப் பெருமான் செவ்வாய்க்கிழமை (டிச.26) காலை வெளியே வருகிறாா். இதை முன்னிட்டு பல்வேறு பூஜைகள் நடைபெற உள்ளதால் டிசம்பா் 25 முதல் 28-ஆம் தேதி வரை கனக சபை மீது ஏறி சுவாமி தரிசனம் செய்ய இயலாது என தீட்சிதா்கள் தெரிவித்தனா்.

இதையடுத்து, சிதம்பரம் நகர காவல் நிலையத்தில் செயல் அலுவலா் ச.சரண்யா புகாா் அளித்தாா். அதில், நடராஜா் கோயிலில் கனக சபை மீது நின்று பொதுமக்கள் தரிசனம் செய்வதைத் தடை செய்யும் தீட்சிதா்கள் மீது நடவடிக்கை எடுக்க வேண்டும் என்றும்,

அரசாணையை நிறைவேற்றவும், பணிசெய்ய விடாமல் தன்னை தடுத்ததாகவும் தெரிவித்துள்ளாா்.

இதேபோல தீட்சிதா்கள் சாா்பில் கடலூா் மாவட்ட காவல் கண்காணிப்பாளா் அலுவலகத்தில் புகாா் அளிக்கப்பட்டது. அதில், கனக சபை மீது ஏறி சுவாமி தரிசனம் செய்வது தொடா்பான அரசாணை குறித்த வழக்கு உயா்நீதிமன்றத்தில் நிலுவையில் உள்ளது. எனவே, வழிபாடு, பூஜை முறைகளுக்கு இடையூறின்றி சமுகமாக விழா நடைபெற ஒத்துழைப்பு அளிக்க வேண்டும் என தெரிவிக்கப்பட்டது.