பாம்பு விஷத்துடன் போதை பார்ட்டி.. பிரபல யூடியூபர் அதிரடி கைது!

டெல்லி அருகே நொய்டாவில் பாம்பு விஷத்துடன் போதை பார்ட்டி நடத்தியதாக பிரபல யூடியூபர் எல்விஷ் யாதவ் கைது செய்யப்பட்டார்.

டெல்லி குருகிராம் அருகே உள்ள வஜிராபாத்தைச் சேர்ந்தவர் எல்விஷ் யாதவ். பாடகர் மற்றும் பிரபல யூடியூபரான இவர், பிக் பாஸ் ஓ.டி.டி.-2 சீசனின் சாம்பியன் ஆவார். இவருடைய வீடியோக்களுக்காகவே சமூக வலைதளங்களில் லட்சக்கணக்கானோர் இவரை பின்தொடர்கின்றனர்.

பிரபலம் என்றாலே பிரச்னை வரும் என்பது போல பாம்பு விஷத்தை வைத்து போதை பார்ட்டி நடத்துவதாக எல்விஷ் யாதவ் மீது குற்றச்சாட்டு எழுந்தது. கடந்த நவம்பரில் நொய்டாவில் நடந்த போதை விருந்து ஒன்றில் 5 நாகப்பாம்புகள் உள்பட 14 பாம்புகள் மற்றும் பாம்பு விஷம் கைப்பற்றப்பட்டது.

விசாரணையில், பார்ட்டிக்கு பாம்பு விஷம் மற்றும் பாம்புகளை ஏற்பாடு செய்ததே எல்விஷ் யாதவ்தான் என்பது தெரிய வந்தது. தொடர் விசாரணைக்குப் பிறகு, வனவிலங்கு பாதுகாப்பு சட்டம் உள்ளிட்ட பிரிவுகளில் எல்விஷ் யாதவை நொய்டா போலீசார் கைது செய்தனர்.

எல்விஷ் யாதவுக்கு 14 நாட்கள் நீதிமன்ற காவல் விதிக்கப்பட்டுள்ளது. இந்நிலையில் எல்விஷ் யாதவை காவலில் எடுத்து விசாரிக்க போலீசார் முடிவு செய்துள்ளனர்.