கார்களுக்கு ரூ.43,000 வரை தள்ளுபடி வழங்கும் ஹூண்டாய் நிறுவனம்… எந்தெந்த மாடல்களுக்கு? லிஸ்ட் இதோ

தென் கொரியாவை சேர்ந்த கார் தயாரிப்பு நிறுவனமான ஹூண்டாய், இந்தியாவில் வரும் மார்ச் 31 வரை தனது வாகனங்களுக்கு நல்ல தள்ளுபடியை வழங்குவதாக அறிவித்துள்ளது. நிறுவனம் இந்த மார்ச் மாதம் குறிப்பிட்ட சில மாடல்களை வாங்கினால் ரூ.43,000 வரை தள்ளுபடி வழங்கப்படும் என அறிவித்துள்ளது.

மார்ச் மாத தள்ளுபடிகளில் கேஷ் டிஸ்கவுண்ட்ஸ், எக்ஸ்சேஞ்ச் போனஸ் மற்றும் கார்ப்பரேட் பெனிஃபிட்ஸ் உள்ளிட்டவை அடங்கும். கிரான்ட் ஐ10 நியோஸ், ஐ20, ஆரா மற்றும் வென்யூ போன்ற மாடல்களுக்கு ஹூண்டாய் நிறுவனம் இந்த மாதம் தள்ளுபடிகளை வழங்குகிறது. SUV-களுக்கான தேவை அதிகரித்து வரும் நிலையில் கார் தயாரிப்பு நிறுவனங்கள் SUV-க்கள் மீது தள்ளுபடி வழங்குவது குறைந்துள்ளது. இந்நிலையில், ஹூண்டாய் நிறுவனம் தனது Venue-விற்கு இந்த மாதம் சலுகைகளை வழங்குகிறது. அதே நேரம் க்ரெட்டா ஃபேஸ்லிஃப்ட், எக்ஸ்டர், டக்ஸன், அல்காசர் எஸ்யூவி-க்கள், வெர்னா செடான் மற்றும் ஐயோனிக் 5 எலெக்ட்ரிக் கார் போன்ற ஃபிளாக்ஷிப் மாடல்களுக்கு இந்த மாதம் சலுகைகள் இல்லை.

ஹூண்டாய் கிராண்ட் ஐ10 நியோஸ்:

ஹூண்டாய் நிறுவனத்தின் Grand i10 Nios மாடலுக்கு ரூ.30,000 கேஷ் டிஸ்கவுண்ட், ரூ.10,000 எக்சேஞ்ச் டிஸ்கவுன்ட் மற்றும் ரூ.3,000 கார்ப்பரேட் டிஸ்கவுன்ட் என மொத்தம் ரூ.43,000 வரை தள்ளுபடி வழங்கப்படுகிறது. இதனால் Grand i10 Nios-ஐ வாங்குபவர்கள் ரூ. 43,000 வரை சேமிக்கலாம்.

ஹூண்டாய் ஐ20:

ஹூண்டாய் நிறுவனம் தனது ஐ20 ஹேட்ச்பேக்கிற்கு இந்த மார்ச் மாதம் மிக குறைவான தள்ளுபடியையே வழங்குகிறது. ரூ.15,000 கேஷ் டிஸ்கவுன்ட் மற்றும் ரூ.10,000 எக்ஸ்சேஞ்ச் டிஸ்கவுன்ட் உட்பட ஹூண்டாய் நிறுவனம் i20-க்கு இந்த மாதம் ரூ.25,000 வரை தள்ளுபடிகளை வழங்குகிறது. மாருதி சுசுகியின் பலேனோ மற்றும் டாடா அல்ட்ரோஸிற்கு போட்டியாக இருக்கும் இந்த காரின் எக்ஸ்-ஷோரூம் விலைகள் ரூ.7.04 லட்சம் முதல் ரூ.11.21 லட்சம் வரை இருக்கிறது.

ஹூண்டாய் ஆரா:

ஹூண்டாய் நிறுவனம் தனது Aura மாடலுக்கு ரூ.33,000 வரை தள்ளுபடிகளை வழங்குகிறது. இதில் ரூ.20,000 கேஷ் டிஸ்கவுன்ட், ரூ.10,000 எக்ஸ்சேஞ்ச் டிஸ்கவுன்ட் மற்றும் ரூ.3,000 கார்ப்பரேட் டிஸ்கவுன்ட் அடக்கம். மாருதி சுசுகியின் டிசையர் மற்றும் ஹோண்டா அமேஸ் ஆகிய மாடல்களுக்கு போட்டியாக இருக்கும் ஆரா, ரூ.6.49 லட்சம் முதல் ரூ.9.05 லட்சம் வரையிலான எக்ஸ்-ஷோரூம் விலைகளில் கிடைக்கிறது.

ஹூண்டாய் வென்யூ:

ஹூண்டாய் நிறுவனத்தின் சப்-காம்பாக்ட் எஸ்யூவி-யான Venue-விற்கு மார்ச் 2024-ல் ரூ.30,000 வரை தள்ளுபடி வழங்கப்படுகிறது. இதில் ரூ.20,000 கேஷ் டிஸ்கவுன்ட் மற்றும் ரூ.10,000 எக்ஸ்சேஞ்ச் டிஸ்கவுன்ட் உள்ளிட்டவை அடங்கும். டாடா நிறுவனத்தின் நெக்ஸான் மற்றும் மாருதி சுசுகியின் பிரெஸ்ஸாவிற்கு போட்டியாக இருக்கும் இந்த காரின் எக்ஸ்-ஷோரூம் விலைகள் ரூ.7.94 லட்சம் முதல் ரூ.13.44 லட்சம் வரை இருக்கிறது.