இந்தியன் 2, தக் லைஃப் படங்களின் அப்டேட் கொடுத்த கமல்ஹாசன்!

விக்ரம் படத்தின் வெற்றிக்குப் பிறகு தொடர்ந்து படங்களில் நடித்து வருகிறார் கமல்ஹாசன். தீவிர அரசியலில் இறங்கிய பின், திரையுலகிலிருந்து அவர் நிரந்தரமாக ஒதுங்கிவிடுவார் என பயந்த ரசிகர்களுக்கு கமலின் முடிவு மகிழ்ச்சி அளித்தது.

கமல் நடிப்பில் இந்தியன் 2, இந்தியன் 3, தக் லைஃப், கல்கி 2898 ஏடி என பல படங்கள் வெளியாக உள்ளன. இவற்றின் நிலை என்ன, எப்போது வெளியாகும் என்பது குறித்து, கமல் சமீபத்தில் அளித்த பேட்டியில் கூறினார்.

பிரபாஸ், அமிதாப்ச்சன், தீபிகா படுகோன் நடித்துள்ள கல்கி 2898 ஏடி படத்தில் கமல் வில்லனாக நடித்திருப்பதாக கூறப்பட்டுவரும் நிலையில், அப்படத்தில் கௌரவ வேடத்தில் நடித்திருப்பதாக கமல் கூறினார். இப்படம் மே 9 ம் தேதி தமிழ் உள்ளிட்ட மொழிகளில் திரைக்கு வருகிறது.

மணிரத்னத்தின் தக் லைஃப் படத்தின் முதல்கட்டப் படப்பிடிப்பில் கமல் கலந்து கொண்டார். செர்பியாவில் இரண்டாம்கட்டப் படப்பிடிப்பு நடந்திருக்க வேண்டும். மக்களவை தேர்தல் கூட்டணி குறித்தப் பேச்சுவார்த்தை இருந்ததால் கமல் இங்கேயே தங்கிவிட, செர்பிய படப்பிடிப்பு தடைபட்டது. தேர்தல் முடிந்ததும், தக் லைஃப் படத்தின் படப்பிடிப்பில் கலந்து கொள்ளவிருப்பதாக கமல் கூறினார்.