குழந்தைகளுக்கு பிடித்த ஹனி சில்லி பொட்டேடோ… ரெசிபி இதோ.!

குழந்தைகள் முதல் பெரியவர்கள் வரை யாருக்குத்தான் உருளைக்கிழங்கு பிடிக்காது. உருளைக் கிழங்கில் வைட்டமின் சி, பொட்டாசியம் உள்ளது.

உருளையை தோலுடன் உண்பதனால் நார்சத்து உடம்பில் சேருகிறது. இதனை வறுத்து உண்பதைவிட வேகவைத்து உண்பதே நல்லது. உருளைகிழங்கை வைத்து வீட்டிலேயே இந்திய-சீன உணவான ஹனி சில்லி பொட்டேடோவை எப்படி செய்யலாம் என்று இந்த பதிவில் தெரிந்துகொள்ளுங்கள்.

தேவையான பொருட்கள் :

உருளைக்கிழங்கு – 6
சோள மாவு – 1 ஸ்பூன்
வெங்காயம் – 1/2 நறுக்கியது
பச்சை குடைமிளகாய் – கால் கப் நறுக்கியது
பூண்டு – 2 ஸ்பூன் பொடியாக நறுக்கியது
இஞ்சி – 2 ஸ்பூன் பொடியாக நறுக்கியது
பச்சை மிளகாய் – 2 நறுக்கியது
மிளகாய் தூள் – 1 ஸ்பூன்
மிளகு தூள் – 1/2 ஸ்பூன்
சோயா சாஸ் – 1 ஸ்பூன்
சில்லி சாஸ் – 2 ஸ்பூன்
தக்காளி கெட்சப் – 2 ஸ்பூன்
உப்பு – தேவையான அளவு
தேன் – கால் கப்
வெங்காயத்தாள் கீரை – ஒரு கைப்பிடி
வெள்ளை எள் – 1 ஸ்பூன்
எண்ணெய் – பொரிக்க தேவையான அளவு

செய்முறை :

முதலில் உருளைக்கிழங்கை தண்ணீர் நன்கு சுத்தம் செய்து தோலை நீக்கி நீளவாக்கில் நறுக்கி வைத்து கொள்ளவேண்டும்.

அடுப்பில் ஒரு பாத்திரத்தை வைத்து அதில் தண்ணீர் ஊற்றி கொதித்ததும் நறுக்கி வைத்துள்ள உருளைக்கிழங்கு மற்றும் தேவையான அளவு உப்பு சேர்த்து வேகவைக்கவும்.

சரியான பதத்திற்கு வரும்வரை உருளைக்கிழங்கை வேகவைத்து தண்ணீரை வடிகட்டி தனியாக எடுத்து நன்றாக ஆறவிடவேண்டும்.

உருளைக்கிழங்கு ஆறியவுடன் சோள மாவை சலித்து உருளைக்கிழங்குடன் சேர்த்து நன்றாக கலந்துவிடவும்.

மேலும் ஒரு கடாயில் எண்ணெய் சேர்த்து சூடானவுடன் உருளைக்கிழங்கை அதில் போட்டு பொன்னிறமாக மாறும் வரை பொரித்து எடுத்துக்கொள்ள வேண்டும்.

அடுத்து அடுப்பில் மற்றொரு பெரிய கடாய் வைத்து எண்ணெய் ஊற்றி காய்ந்ததும் நறுக்கி வைத்துள்ள இஞ்சி, பூண்டு சேர்த்து வதக்கவும்.

பின்னர் நறுக்கி வைத்துள்ள பச்சை மிளகாய், வெங்காயம் சேர்த்து நன்கு கலந்து விடவும்.

அதன் பின் நறுக்கிய பச்சை குடைமிளகாய், தேவையான அளவு உப்பு, மிளகு தூள், மிளகாய் தூள் சேர்த்து நன்கு கலந்துவிடவும்.

அவை அனைத்தும் சிறுது வதங்கியவுடன் அதனுடன் தேவையான அளவு சோயா சாஸ், சில்லி சாஸ், தக்காளி கெட்சப் சேர்த்து நன்கு கிளறி விடவும்.

அனைத்தும் நன்கு வதங்கியவுடன் அடுப்பை அணைத்து விட்டு சிறிது தேன் சேர்த்து கலந்து அதனுடன் பொரித்து வைத்துள்ள உருளைக்கிழங்கையும் சேர்த்து மெதுவாக கலந்து விடவும்.

இறுதியாக நறுக்கிய வெங்காயத்தாள் கீரை, வெள்ளை எள்ளு சேர்த்து கலந்துவிட்டால் சுவையான ஹனி சில்லி உருளைக்கிழங்கு ரெடி.