தெறிக்கும் திகில்.. ₹100 கோடி வசூலில் இணைந்த மாதவன் – ஜோதிகா படம்

2023 ல் வெளியான குஜராத்தி, சூப்பர்நேச்சுரல் ஹாரர் திரைப்படம் வஷ் (Vash). இந்தப் படத்தை கிருஷ்தேவ் யாக்னிக் எழுதி இயக்கியிருந்தார். ஒரு பைலட் தனது மனைவி மற்றும் இரு குழந்தைகளுடன் விடுமுறையை கழிக்க தனிமையான ஒரு இடத்துக்குச் செல்கிறார். அங்கு வரும் அந்நியன் ஒருவனுக்கு பைலட்டைக் குறித்துத் தெரிந்திருக்கிறது.

அவன் இவர்களுக்கு உதவ முன்வர, பைலட்டும் அதற்கு அனுமதிக்கிறார். பிறகுதான், அவர்கள் அந்த அந்நியனின் பிளாக்மேஜிக் உலகில் மாட்டிக் கொண்டிருப்பது தெரிய வருகிறது. 45 லட்சத்தில் எடுக்கப்பட்ட இப்படம் ரசிகர்களால் விரும்பி பார்க்கப்பட்டது. இதனை இந்தியில் ‘சைத்தான்’ என்ற பெயரில் ரீமேக் செய்தனர். பைலட் கதாபாத்திரத்தில் அஜய்தேவ்கன், அவரது மனைவியாக ஜோதிகா, அந்நியனாக மாதவன் நடித்தனர். விகாஷ் பால் படத்தை இயக்கினார். சுமார் 65 கோடி பட்ஜெட்டில் இப்படம் தயாரானது.

கோவிட் பெருந்தோற்றுக்குப் பின் இந்தியில் ரீமேக் செய்யப்பட்ட படங்கள் அனேகமாக அனைத்தும் தோல்வியே தழுவின. அஜய்தேவ்கன் நடிப்பில் கடைசியாக வெளியான, தமிழ் கைதியின் ரீமேக்கான ‘போலா’வும் தோல்வியடைந்தது. சைத்தான் வெற்றி பெறுமா என்ற சந்தேகத்துடனே மார்ச் 8 ம் தேதி, படத்தை வெளியிட்டனர். முதல் நாளிலிருந்து கிடைத்த நேர்மறை விமர்சனங்கள் படத்தை காப்பாற்றியுள்ளது. முதல் 10 தினங்களில் 100 கோடிகளை இந்தியாவில் படம் வசூலித்துள்ளது.

இது அஜய்தேவ்கன் நடிப்பில் 100 கோடிகளைத் தாண்டும் 14 வது படமாகும். பல வருடங்களுக்குப் பிறகு ஜோதிகா ‘சைத்தான்’ படத்தின் மூலம் இந்திப் படத்தில் ரீஎண்ட்ரி கொடுத்துள்ளார். ‘சைத்தான்’ அவரது ரீஎன்ட்ரியை அர்த்தமுள்ளதாக்கியிருக்கிறது.