சோனியா காந்தியின் சொத்து மதிப்பு இவ்வளவு தானா.. வேட்புமனுவில் தகவல்

முன்னாள் காங்கிரஸ் தலைவர் சோனியா காந்தியின் சொத்து மதிப்பு 12 கோடியே 53 லட்ச ரூபாய் என்று வேட்புமனுத் தாக்கலில் தெரிவிக்கப்பட்டுள்ளது.

ராஜஸ்தான் மாநிலத்தில் இருந்து மாநிலங்களவை தேர்தலில் போட்டியிட சோனியா காந்தி வேட்புமனு தாக்கல் செய்திருந்தார்.
அதில், தனக்கு இத்தாலியில் குடும்ப பூர்வீக சொத்தில் பங்கு இருப்பதாகவும், அதன் மதிப்பு 27 லட்ச ரூபாய் என்றும் தெரிவித்துள்ளார். அதிலிருந்து தனக்கு வருமானம் வந்து கொண்டிருப்பதாகவும் குறிப்பிட்டுள்ளார். கைவசம் 90 ஆயிரம் ரூபாய் ரொக்கமாக இருப்பதாகவும் சோனியா காந்தி தெரிவித்துள்ளார். தனது மொத்த சொத்து மதிப்பு 12 கோடியே 53 லட்சத்து 76 ஆயிரத்து 822 ரூபாய் எனவும் சோனியா காந்தி குறிப்பிட்டுள்ளார்.

ரூ.49 லட்சம் மதிப்பில் ஒன்றரை கிலோ தங்கம் இருப்பதாகவும், 88 கிலோ வெள்ளி இருப்பதாகவும் தெரிவித்துள்ளார். 2014-ல் சோனியாவுடைய சொத்து மதிப்பு ஒன்பது கோடியே 28 லட்ச ரூபாயாக இருந்த நிலையில், தற்போது அது 12 கோடியே 53 லட்ச ரூபாயாக அதிகரித்துள்ளது.