UPI Usage: என் இ எஃப் டி, டெபிட் கார்டுகளை பயன்படுத்த தயங்கும் மக்கள்… காரணம் என்ன?

2023ம் ஆண்டு நவம்பர் மாதத்தில் யுபிஐ பரிவர்த்தனைகளின் மதிப்பு 46 சதவிகிதம் வளர்ச்சியடைந்துள்ளது. ஆனால் என் இ எஃப் டி சேவை 17.5% மட்டுமே உயர்ந்துள்ளது. அதாவது யுபிஐ வளர்ச்சியில் பாதிக்கும் குறைவாகவே உள்ளது. இது மட்டும் இல்லாமல் சின்ன தேவைகளுக்கு ஏடிஎமில் இருந்து பணம் எடுக்கும் பழக்கமும் வெகுவாக குறைந்து வருகிறது. இதனால் டெபிட் கார்ட் மூலமாக மேற்கொள்ளப்படும் பரிவர்த்தனைகளும் அக்டோபர் மாதத்தில் 6.6 சதவிகிதம் மட்டும் அதிகரித்துள்ளது.

பணம் செட்டில் செய்யப்பட்ட தொகையின் அடிப்படையில், டெபிட் கார்டு பரிவர்த்தனைகள் நவம்பர் மாதத்தில் யுபிஐ மூலம் செட்டில் செய்யப்பட்ட தொகையில் மூன்றில் ஒரு பங்கு மட்டுமே ஆகும்.

டெபிட் கார்ட் பயன்பாடு என்பது தற்போது கிராமப்புறங்களில் உள்ளது. ஆனால் நகர்ப்புற பகுதிகளில் டெபிட் கார்ட் பயன்பாடு கணிசமாக குறைந்துள்ளது. நகர்ப்புறப் பகுதிகளில் பெரும்பாலான பணபரிவர்த்தனைக்கு யுபிஐ பயன்படுத்தப்படுகிறது.

யுபிஐ பரிவர்த்தனைகள் அளவு மற்றும் மதிப்பில் முறையே 118% மற்றும் 106% அதிகரித்துள்ளன. யுபிஐ வசதியை பயன்படுத்தி இ காமர்ஸ் பரிவர்த்தனைகளும் மேற்கொள்ள முடியும் என்பதால் என் இ எஃப் டி மற்றும் டெபிட் கார்ட் பயன்பாடு வெகுவாக குறைந்துள்ளது.

இதுமட்டும் இல்லாமல் யுபிஐ பயன்பாடு தொடர்ந்து அதிகரித்து வருவதால், அதன் வரம்பு தொகையை தேவைக்கு ஏற்ப ஆர்பிஐ உயர்த்தி உள்ளது. அதாவது யுபிஐ சேவை மூலமாக மருத்துவமனை செலவு மற்றும் கல்வி நிறுவனங்களுக்கு பணம் செலுத்துவதற்கான வரம்பு ரூ. 1 லட்சத்தில் இருந்து ரூ.5 லட்சமாக உயர்த்தப்பட்டுள்ளது. இதுமட்டும் இல்லாமல் மியூச்சுவல் ஃபண்ட் முதலீடு, இன்சூரன்ஸ் பிரீமியம் செலுத்துவது ஆகியவற்றுக்கான வரம்பும் உயர்த்தப்பட்டுள்ளது.