இஸ்லாமிய பெண்கள் மீது கலர் தண்ணீர் ஊற்றி, ஜெய் ஸ்ரீராம் முழக்கமிட்ட இளைஞர்கள்.. உ.பியில் அதிர்ச்சி சம்பவம்!

உத்தர பிரதேசத்தில் ஹோலி கொண்டாட்டத்தின் போது இஸ்லாமிய குடும்பத்தினர் மீது கலர் தண்ணீர் ஊற்றி, ஜெய் ஸ்ரீராம் என்று முழக்கம் எழுப்பி சிலர் அத்துமீறலில் ஈடுபட்டது தொடர்பாக ஒருவர் கைது செய்யப்பட்டுள்ளார்.

யோகி ஆதித்யநாத் தலைமையிலான பாஜக ஆட்சி நடந்துவரும் உத்தர பிரதேச மாநிலம் பிஜ்னோரில் ஹோலி கொண்டாடப்பட்டது. அப்போது முஸ்லிம் இளைஞர் ஒருவர், தனது குடும்பத்தினருடன் சாலையில் வந்தபோது, அவரை வழிமறித்த சில இளைஞர்கள், அவர் மீதும், அவரது குடும்பப் பெண்கள் மீதும் வண்ணத் தண்ணீரை பூசி அநாகரிகமாக நடந்துகொண்டனர்.

அப்பெண்கள் ஆத்திரமாக கத்தியும் அந்த இளைஞர்கள் கண்டுகொள்ளாமல் ஜெய் ஸ்ரீராம் என்று முழக்கமிட்டு அத்துமீறலில் ஈடுபட்டனர். இந்த வீடியோ சமூக வலைதலங்களில் வெளியாகி அதிர்வலைகளை ஏற்படுத்தியதை தொடர்ந்து, அனிருத் என்பவர் கைது செய்யப்பட்டார்.

மூன்று சிறார்கள் இந்த சம்பவத்தில் சிக்கியுள்ளனர். யார் மீதும் வலுக்கட்டாயமாக வண்ணங்களைப் பயன்படுத்த கூடாது என உத்தர பிரதேச காவல்துறை கேட்டுக்கொண்டுள்ளது குறிப்பிடத்தக்கது.